Twee op Eenmal

PaulEberhardt on Sept. 22, 2020

Moin an all de, de sik noch op düt Comic besinnen könnt! Ik dank jo, dat ji ok woller dor sünd, un dat deit mi leed, dat ik so lang bruukt hebb.
Moin ok an de, de dat noch nich kennt, oder dat blots vergeten hebbt, wieldat dat so bannig lang her is! Ik haap dat gefallt jo! Af un an laad ik sogor ok mal neie Döntjes vun Gundula un Tiger in't Nett.
Üm mien ersten neien Teken siet twee Jahren to fiern, kriggt ji hier glieks beide to sehn.

Dat Corona-Cartoon:
Gundula smitt nienich wat wech, wenn't noch geit. De olle Pestmask is wohraftig noch goot, wiel se just dat deit, wat de Snutenbüdel vun vundag ok maakt: du kannst nich ut Versehn anner Lüe dien Viren in't Antlaat pusten. Di sölbens schulen doot se beide nich, man dragen mutt'n sowat! Wi hebbt al inne Narichten sehn, wat los is, wenn keeneen dat deit: denn kriggt wi Tostänn, as in de Tied as Gundi ehr Mask noch modern weer. Also denn: jümmers Snutenbüdel över Mund un Nees, ok wenn't een op de Nerven geit - un wenn't blots is, dat du wiest dat di anner Lüe nich egal sünd.
Corona wiest us, dat wi Minschen de Natur noch lang nich so in'n Gripp hebbt, as us dat woll duch. Ik haap man, dat wi dor wat ut lehrt.

Speegel, Speegel anne Wand:
Jou, dat schall wohraftig neie Sieten geven. Blots wann de tokamen Siet fardig ward, weet ik noch nich. Ik hebb woll veel Ideen opschrieven, de ik all gern teken will, un ik hebb mi dor nu woller ransetten, man ik mutt dat wohraftig woller een beten öven. Ik mark dat, wieldat ik lang nich so flink bün, as ik mal weer. Dat kriig ik jichenswann woll wedder hen, man ik mutt mi erstmol wedder in allens rinfinnen.
Dorto kaamt, dat ik lange Sieten in Arbeet hebb, un bunt maken will ik de ok. Dat mutt, ok wenn't mehr Tied bruukt - ik krigg ja ok mit, wat ji goot finnt, un dat is ok mien Anmaleree.

GUNDULA & TIGER TO BESÖÖK:
Dat mutt ik jo nu noch vertellen: Gundula un Tiger sünd opstunns in een anner Webcomic to Besöök. Dat heet Danielle Dark, un mien goten Comic-Fründ Jay Bradley tekent dat. De kriggt mien Tiger, Gundi un Krischan bannig goot hen, un of ji Engelsch könnt oder nich, kickt jo dat mal an. Ik hebb mi dor al bannig över freit. De Engelsch kann un'n nich allto grugelige man ok so spannende Geschicht mit Vampiren un Wickerschen lesen mach, den kann ik ok dat ganze Comic rekomderen.
Dat is de Link, woneem Gundi un Tiger to'n eersten Mal bi em opdukt:
https://www.theduckwebcomics.com/Danielle_Dark/5640074/
Un dat is de Siet, woneem't mit jem wieter geit:
https://www.theduckwebcomics.com/Danielle_Dark/5641623/